हाम्रोबारे

३२ औं वर्षको यात्रा प्रारम्भ 
‘समाज रुपान्तरणमा अबिराम चेष्टा’
    तीन दशकभन्दा अघि सुरु भएको एउटा सानो प्रयत्न, ‘चेष्टा पब्लिकेशन’ नागरिकहरुको चिनिने रुपमा सशक्त संस्थागत आवाज बनेको छ । ३२ वर्ष अघि सुरू भएको यो यात्रा केवल पत्रिका प्रकाशनको निरन्तरता मात्रै होइन, यो सत्य र समाज रुपान्तरणप्रतिको अडिग प्रतिज्ञाको यात्रा हो । आर्थिक वर्ष २०५०÷०५१ मा २०५० साल भदौ ३० गते जिल्ला प्रशासन कार्यालय काभ्रेपलाञ्चोकमा मासिक रुपमा प्रकाशन गर्ने गरी दर्ता भएको जिल्लाको पहिलो पत्रिका चेष्टा २०५६ साल कार्तिक ११ गत विहिबार देखि साप्ताहिक प्रकाशन शुभारम्भ भएको थियो । मासिक रुपमा ३२ वर्ष र साप्ताहिक रुपमा २६ वर्षे यात्रा प्रारम्भ गरेको चेष्टाको मुल्यांकन यसले प्रदान गरेका सामाग्रीहरु, यसले लिएका समाज रुपान्तरणका अडानहरु र यसले सत्यका पक्षमा उठाएका जोखिमहरुले नै पुष्टि गरिसकेको छ ।
    ‘चेष्टा’ ले आफ्नो सुरुवातदेखि नै एउटा स्पष्ट दर्शन बोकेको छ–असल समाज निर्माणका लागि सत्य समाचारको सम्प्रेषण । यही दर्शनका साथ हामीले कलमलाई आवाजविहीनको आवाज, दृष्टिविहीनको दृष्टि र न्याय खोज्नेको सहारा बनाएका छौं । राज्यका निकायहरूको नजर पुग्न नसकेका टाढा गाउँदेखि सहरका अँध्यारा गल्लीसम्म, जहाँ नागरिक अन्याय र हैरानीमा परेका छन्, त्यहाँ ‘चेष्टा’ को कलम पुगेको छ । सत्य र तथ्यमा आधारित समाचार लेख्ने हाम्रो निष्ठा कहिल्यै डगमगाएको छैन । हामीलाई थाहा छ, सबै विषय सबैलाई मनपर्छ भन्ने ग्यारेन्टी हुँदैन । तर पत्रकारिताको मूल धर्म भनेकै सत्य बोल्नु हो, चाहे त्यो अप्रिय किन नहोस् । त्यसैकारण ‘चेष्टा’ सधैं तथ्य, प्रमाण र निष्पक्षताको जगमा उभिएको छ ।
    तीन दशकको यात्रामा न दवाबको कमी थियो, न प्रलोभनको । तर हामी कहिल्यै झुकेनौं, कहिल्यै सम्झौता गरिनौं । अभावमा पनि हाम्रो कलम थामियो, दवाबमा पनि हाम्रो आवाज मौन बनेन । हामीले सत्ताको शक्तिलाई चुनौती दियौं, र नागरिकका पीडालाई आवाज बनायौं । ‘चेष्टा’ केवल समाचार संस्था होइन, यो न्याय र परिवर्तनप्रतिको सामाजिक प्रतिबद्धता हो । आज देश चरम राजनीतिक संक्रमणकालमा छ । आर्थिक संकटमा छन् पेशा ब्यवसाय गर्नेहरु । रोजगारीका अवसर शून्यजस्तै छन्, उद्योगधन्दा बन्द हुँदैछन्, युवाहरू विदेशी भूमिमा भविष्य खोज्दैछन् । राजनीतिक अस्थिरताले समाजका सबै तह प्रभावित छन् । तीन तहका सरकारको अपारदर्शी खर्चले नागरिकमा निराशा छाएको छ । यस्तो कठिन घडीमा पनि ‘चेष्टा’ ले आफ्नो पहिलो शर्त ‘नागरिकप्रतिको दायित्व’ लाई मानेर अगाडि बढिरहेको छ । पत्रकारिता केवल पेशा होइन । यो दायित्व हो, र हामी त्यो दायित्वबाट कहिल्यै पछि हट्ने छैनौं । 
    प्रविधी र विश्वसनीयताको चुनौती पछिल्लो समय बढेको छ । आजका पाठक स्मार्टफोनमा संसार पढ्छन् । सत्य, तथ्य र विश्वसनीय जानकारी पु¥याउनु अझ चुनौतीपूर्ण बनेको छ । पत्रिकालाई प्रत्येक घरमा पु¥याउनु मात्र होइन, विश्वास कायम राख्नु नै ठूलो जिम्मेवारी हो । ‘चेष्टा’ ले यो चुनौतीलाई अवसरको रूपमा लिएको छ । प्रविधिसँगै हिँड्दै पनि पत्रकारिताको मूल आत्मा जोगाइराख्ने प्रणका साथ ‘चेष्टा’ निरन्तरत अघि बढिरहेको छ । 
३१ वर्ष लामो यात्राको साक्षी तपाई हाम्रा पाठक, विज्ञापनदाता र शुभेच्छुकहरू नै हुनुुहन्छ । तपाईंहरूको माया, सद्भाव र विश्वासकै कारण यो यात्रा सम्भव भएको हो । प्रत्येक अंकमा, प्रत्येक समाचारमा, तपाईंहरूको भरोसा हाम्रो प्रेरणा बनेको छ । त्यही भरोसा र विश्वासलाई अझ सुदृढ बनाउँदै, हामी आगामी वर्षहरूमा पनि सत्य, निष्पक्षता र समाज रुपान्तरणको यात्रामा निरन्तर लागि रहनेछौं । ‘चेष्टा’ को नाममा हाम्रो प्रतिज्ञा छ । ‘चेष्टा’ को अर्थ नै हो ‘अविराम प्रयत्न’ । हाम्रो नामले नै हाम्रो दर्शन बोकेको छ । सत्यका लागि निरन्तर चेष्टा, समाजका लागि निरन्तर जागरण, र जनताको लागि निरन्तर जिम्मेवारी । 
    हामीले सुरु गरेको बाटो सजिलो छैन, तर यही बाटोले परिवर्तन ल्याउँछ भन्ने विश्वास छ । ३२ औं वर्ष प्रवेशका यस अवसरमा, हामी पुनः प्रतिबद्ध छौं । सत्य बोल्ने, जनताको पक्षमा रहने र कहिल्यै नझुक्ने ‘चेष्टा’ सधैं रहि रहनेछ ।

अध्यक्ष
चेष्टा पब्लिकेशन प्रा.लि.

सम्पादकको सन्देश