2019 November 13/ 05:30: 16am

    धुलिखेल/धुलिखेल नगरपालिका वडा नम्वर ४ अरनिको राजमार्ग सँगै रहेको काठमाडौ विश्वविद्यालय मार्ग सडकको ३ आना जग्गा विक्री प्रकरणमा पक्राउ परेकाहरुलाई जिल्ला अदालत काभ्रेपलाञ्चोकले धरौटीमा छाड्न आदेश दिएको छ । 
    जिल्ला न्यायाधीश अर्जुनप्रसाद अधिकारीको इजलाशले पक्राउ परेका साविक धुलिखेल नगरपालिका वडा नम्वर ७ हाल धुलिखेल नगरपालिका वडा नम्वर ४ घर भएका लोकेन्द्र तोलाङ्गेलाई २२ लाख ५० हजार धरौटी माग गरेको छ । त्यस्तै उनकै श्रीमती सोनु तोलाङ्गलाई एक लाख रुपैया धरौटी माग गरेको छ भने जग्गा विक्री गर्ने भक्तपुर घर भएकी मिला भैललाई १२ लाख रुपैयाँ धरौटी माग गरेको छ । अर्का एक महाभारत गाउँपालिका ४ का ज्ञानबहादुर मोक्तान फरार छन् । 
    फौजदारी संहिताको दफा २४९ को १ र २ को कसुर ३ को ग मा ठगी अयिभोगमा मुद्दा चलाईएका ब्यक्ति दोषि ठहर भएमा ७ वर्ष सम्म कैद र ७० हजार जरिवना तोक्न सक्ने ब्यवस्था उल्लेख गरिएको छ । सोहि कानुनको दफा २५४ मा विगो अनुसार असुलको गर्न प्रहरीले माग दावी पेश गर्न सक्ने ब्यवस्था छ । जिल्ला प्रहरी कार्यालय काभ्रेले पक्राउ परेकाहरुलाई सोहि दफा अनुसार सरकारी वकिलको कार्यालयमा मुद्दा बुझाएको थियो । 
    २०६२ साल भदौ ९ गते साविक कित्ता नम्वर ६३३ को १० आना ३ दाम क्षेत्रफलबाट मैया सार्कीले कित्ताकाट गरी ६५१ कित्ताको ७ आना ३ दाम जग्गा रविन्द्र श्रेष्ठ यगोल धुलिखेललाई ६० हजार रुपैयाँमा विक्री गरेकी थिईन् । धुलिखेल नगरपालिकाका इन्जिनियर जैसिलाल मण्डलले उक्त जग्गामा घर बाटो केहि नभएको देखिन्छ भन्दै सिफारिस गरिदिएका छन् । २०४८ सालमा खुलेको काठमाडौ विश्वविद्यालय जाने सडक त्यतिबेला देखि नै संचालनमा छ । इन्जिनियर जैसिलाल मण्डलले किन सडक भएको जमिनलाई छैन भनेर सिफारिस गरे ? रहस्यको विषय बनेको छ । ६३३ कित्ताकै बाँकी ३ आना जग्गा ६५२ कित्तामा कायम भई मैया सार्कीकै नाममा बाँकी रहेको थियो ।
    २०७१ असार १२ गते मैया सार्कीले २ लाख ५० हजार रुपैयामा ज्ञानबहादुर मोक्तान र लोकेन्द्र तोलाङ्गेलाई विक्री गरिन् । जतिबेला धुलिखेल नगरपालिकाका कार्यकारी अधिकृत हरिराम नागिलाले २०७१ असार ११ गते कित्ता नम्वर ६५२ मा घर छैन तथा फिल्डमा पक्की मोटरबाटो सँग जोडिएको छ भन्ने ब्यहोराको घरबाटो प्रमाणित गरिदिए । त्यतिबेला पनि ६५२ नम्वर कित्ताका ३ आना जग्गा मुल सडकमै थियो । कार्यकारी अधिकृत नागिलालकोे उक्त सिफारिसमा कैफियत देखिएको छ ।
    मैया सार्कीले बेचेको उक्त जग्गा पुनः २०७३ साल बैशाख ७ गते लोकन्द्र विष्टले ज्ञानबहादुर मोक्तानको जिल्ला अदालतबाट अधिकृत वारेसनामा लिई एक्लै मिना भैललाई ६ लाख ५० हजार रुपैयाँमा विक्री गरेका थिए । २०७१ असार ११ गते प्रमाणित गरिएको घर बाटो सिफारिसकै आधारमा दोश्रो पटक जग्गा किनबेच भयो । मिना भैलले २०७५ असोज ५ गते कृष्णराम दुवाल र लक्ष्मीप्रसाद प्रजापतिलाई १२ लाख रुपैयाँमा विक्री गरेकी थिईन् । मालपोत कार्यालयले पुनः २०७१ असार ११ गते लिएको घरबाटो प्रमाणित सिफारिसका आधारमा जग्गा पास गरिदिएको छ । स्थानीय सरकारको अनिवार्य सिफारिस आवश्यक पर्ने भए पनि मालपोत कार्यालयले पिच सडकको राजश्व बुझाएका आधारमा पुरानै सिफारिसमा पास गरिदिएको छ ।